सरफरोशी की तमन्ना...

      "सरफ़रोशी की तमन्ना...!!!
(स्वातंत्र्याचा ध्यास घेऊन बलिदान करायला निघालेल्या शहिदांचे मनोगत मांडणारे हे गीत आजही मला तितक्याच तडफेने साद घालत असते. त्याच गीताचा आशय असणारा हा स्वैर अनुवाद नाही; परंतु प्रेरणा तीच आहे.)

विद्रोहाची पेटली ठिणगी, आज काळजात आहे...।
पहायचा तो जोर किती, शत्रूच्या मनगटात आहे...।।धृ।।

विश्वास ज्यांच्या मदतीचा ते, हात बांधून उभे आहेत...।
नव्हती आशा कधीही केली, ते सारे पाठीशी आहेत...।।
परीक्षा तर ही खर्‍या-खोट्यांची, आज जो साथ आहे...।
पहायचा तो जोर किती, शत्रूच्या मनगटात आहे...।।१।।

घात करण्या शत्रू टपला, मोका तो शोधून आहे...।
छातीवर तो वार झेलण्या, श्वास मी रोखून आहे...।।
मरणाची भीती कुणाला, शीर तर हातात आहे....।
पहायचा तो जोर किती, शत्रूच्या मनगटात आहे...।।२।।

आतापासून काय सांगू, हे गरजणार्‍या नभा...।
शत्रूचे ते रक्त चाटण्या, आतुर झाल्या या जिभा...।।
विस्तवाचे वाण सतीचे, आज बांधले पदरात आहे...।
पहायचा तो जोर किती, शत्रूच्या मनगटात आहे...।।३।।

अन्यायाच्या वादळाने, ठिणगी ही विझणार नाही...।
स्वाभिमानी रक्त आमुचे, मान ही झुकणार नाही...।।
पेटला वणवा क्रांतिचा, दहशत जंगलात आहे...।
पहायचा तो जोर किती, शत्रूच्या मनगटात आहे...।।४।।

विद्रोहाची पेटली ठिणगी, आज काळजात आहे...।
पहायचा तो जोर किती, शत्रूच्या मनगटात आहे...।।

                               -- श्री नंदकिशोर गायकवाड.